24.8 C
Скопје

Индиската мутација ги напаѓа и тие со силен имунитет, вакцинираните да не се грижат

Експертите предупредуваат дека индиската мутација има потенцијал да биде доминантна варијанта, како што тоа се случи за време на третиот бран на пандемијата со британскиот сој на вирусот. Епидемиолозите смируваат дека вакцините што се развиени и се администрираат во земјава, се ефикасни и против индиската варијација.

Вакцините дефинитивно ќе делуваат и на индиската варијанта на коронавирусот дури и кога таа би станала доминантна во Македонија, тврди за „Слободен печат“, поранешниот директор на Центарот за јавно здравје Скопје и поранешен член на Комисијата за заразни болести, епидемиологот Александар Стојанов. Според него, единственото „оружје“ што ѝ стои на располагање на државата за справување со пандемијата е вакцинацијата, која треба уште помасовно да се одвива. Доктор Стојанов смета дека во природата на вирусот е да се приспособува и да се создаваат нови и нови варијанти, меѓутоа, тоа нема да ја намали ефикасноста на вакцините. Неговиот коментар доаѓа по изјавата на регионалниот директор на Светската здравствена организација (СЗО) за Европа, Ханс Клуге, кој алармираше дека индиската мутација на коронавирусот се шири брзо, дека може да ги зарази луѓето со силен имунитет и дека вакцинацијата досега спроведена во Европа не е гаранција во доволна мера дека мутантот нема да се рашири.

– Можеби вакцините нема да бидат толку ефикасни во тој обем, бидејќи тие сепак се дизајнирани за почетната варијанта. Меѓутоа, индискиот не е сосема нов вид. Сигурно нема некој да заврши во болница и да почине. Сигурно дека со вакцината состојбата ќе му биде подобра. Нема да биде така страшно. Не само за овој вид, туку и за другите мутации се однесува истото – вели д-р Стојанов.

Инаку, додава тој, индиската варијанта ја имаме веќе подолго време во Европа, барем еден месец.

– И британската варијација беше позаразна, се рашири брзо. Но, за британскиот тип имавме иста вакцина. Така што, не е толку страшно. Клуге сигурно има поквалитетни информации, но би пристапил со задршка. Факт е дека мерките не треба да се попуштаат, затоа што уште го има вирусот околу нас, иако се паднати бројките на новозаразени. Со овој обем на вакцинација, дури и да го снема вирусот во Европа и да се стави под контрола, сепак тој ќе постои на другите континенти како Азија и Америка – посочува д-р Стојанов.

Коментарите на високиот претставник на СЗО доаѓаат во пресрет на летните одмори, кога граѓаните патуваат почесто и посетуваат повеќе земји. Со тоа расте и ризикот да се донесе индиската варијанта во земјава. Клуге предупреди да не се повтори грешката од минатото лето и апелираше до граѓаните да ги почитуваат превентивните мерки.

Во Македонија веќе е пријавен еден случај на патник вратен од Блискиот Исток, кој бил заразен со индискиот вид на коронавирусот. Тој беше хоспитализиран во приватна болница и е во стабилна здравствена состојба. Здравствените власти велат дека се работи за изолиран случај и дека не претставува опасност за јавното здравје, зашто пациентот бил спроведен во земјава на лекување по сите протоколи и изолиран.

Поврзани вести

Лукаревска: Наша единствена алтернатива е ЕУ

Слободен печат

Пукотница во Старата скопска чаршија

Слободен печат

Филипче од Штип: Покажавме дека за нас зборот е збор, го имаме најдоброто за секоја општина

Слободен печат

Ексцентричен тајкун, креатор на најпознатата антивирусна програма, пронајден мртов неколку часа по одлуката за екстрадиција

Слободен печат

Заев тврди дека не разговарал со Ахмети за промена на знамето, грбот и химната

Слободен печат

Заев за новите проекти: Се воведува еколошка такса, ќе се инвестира во обновливи извори

Слободен печат

Остави Коментар