Имала генијална идеја за да побегне од малтретирањето: На 13 години започнала бизнис, на 19 станала милионерка
Лив Конлон (21) врсниците во училиште ја задевале и ѝ префрлувале, бидејќи секогаш добивала добри оцени, а тоа ја мотивирало да работи уште повеќе. На 13 години, пред да заврши со училиштето, почнала да работи со продавање на вештачки нокти, а 6 години подоцна ги заработила и своите први еден милион фунти.
– Другарите толку многу ме малтретираа што морав да го сменам училиштето, а на 13 години почнав да продавам вештачки нокти од Кина на еден онлајн-сајт – раскажува Лив, која тогаш во својот прв бизнис вложила 300 фунти, кои ги заработила благодарение на домашните работи и набрзо на нив заработила 5000 фунти.
Набрзо почнала да работи друга работа, во компанијата „The Property Stagers“, која изнајмува недвижнини кои чекаат за продажба. Инспирацијата ѝ дошла кога нејзината мајка Али сакала да го продаде станот кој го купила како инвестиција, па Лив предложила да ѝ помогне да го декорира. А тоа очигледно го направила одлично – бидејќи само три дена откако го преуредила, станот се продал.
Така почнала уште во средно училиште да стажира во агенција за изнајмување, а одела и на разни настани и разговарала со многу луѓе од таа бранша и сфатила дека постои „вакуум“ во трговијата.
Професорите ѝ кажувале дека „си го упропастила животот отстапувајќи од факултетот и свртувајќи се кон приватниот бизнис“, само нејзината мајка ѝ била поддршка.
– Својот прв клиент го пронајдов во 2015 година, а тогаш и ја скратив косата за да изгледам постара – раскажува Лив, која на почетокот немала средства, но за првиот надоместок кој изнесувал 1000 фунти купила мебел и почнала да собира залихи. Така веќе првата година средила 25 објекти, најмногу во Глазгов и Единбург, направила свое портфолио и се вмрежила со цел да пронајде нови клиенти.
– Беше исцрпувачки, но и возбудливо. Работев 18 часа на ден и мојот живот стана поинаков од животот на моите пријатели кои излегуваа додека јас работев. Па со текот на времето се разидовме – раскажува младата претприемачка.
Во првите години заработила над 30.000 фунти и успеала себеси да си исплати плата и пак да вложи во нов мебел. Тогаш и нејзината мајка ја напуштила работата како советник за да може да работи за неа, а другата година нејзината фирма надминала добивка од милион фунти.
– Беше неверојатно, но морав попатно да научам сè околу управувањето и финансирањето во брзорастечката компанија. За среќа, секогаш покрај себе имав книговодител да ми помогне – раскажува Лив, која сега се занимава со производство и извоз на мебел, има неколку складови и има тим од 10 луѓе во Глазгов и во Манчестер.
Се буди уште во 4 наутро, а потоа работи 10 часа до ручекот со пријателите, од кои се повеќето постари и ги запознала на работа. Признава дека нема време за друштвен живот.
– Среќна сум и сама, немам време за врска – кажува Лив, која уште на 18 години ја купила својата прва куќа, а сега е сопственичка на голема куќа во која живее со мајка ѝ. Без оглед на тоа колку заработува, не троши многу на материјални работи, бидејќи преферира патувања и искуства.
