Бернард Арно, милијардерот и шеф на глобалниот конгломерат на луксузни брендови LVMH, го престигна Илон Маск и стана најбогатиот човек на светот.

Богатството на Арно и неговото семејство се зголеми за 23,6 милијарди долари во петокот на 207,8 милијарди долари, надминувајќи го богатството на извршниот директор на Тесла, Илон Маск, од 204,5 милијарди долари, според рангирањето на Форбс во реално време. Арно стигна до првото место во петокот, 26 јануари 2024 година, пишува Форбс.

Вредноста на компанијата на Маск, Тесла, падна за 13 отсто на берзата во четвртокот, поради што Маск загуби над 18 милијарди долари. Во исто време, акциите на LVMH добија голем удар во петокот: нивната вредност се зголеми за над 13 отсто до 11 часот, поттикната од силната продажба. Пазарната капитализација на LVMH во петокот достигна 388,8 милијарди долари, додека Tesla на берзата вреди 586,14 милијарди долари.

Во 2021 година, LVMH ја купи Tiffany & Co, за речиси 16 милијарди долари, што се смета за најголема аквизиција на луксузен бренд во историјата. Холдинг-компанијата на Арно, Agache е поддржана од VC фирмата Aglaé Ventures, за која Форбс објави дека инвестира во бизниси како што се Netflix и ByteDance, матичната компанија на TikTok.

Арно има пет деца, сите работат во LVMH. Тој неодамна назначи двајца од неговите синови во одборот на конгломератот, каде што веќе седат уште две деца, сè во обид да обезбеди долгорочна контрола на семејството врз неговата деловна империја.