Веќе од следната недела започнува пријавувањето за упис во прва година на додипломските студии на универзитетот „Св. Кирил и Методиј“-Скопје за претстојната 2025/26 академска година. Првото пријавување ќе биде на 19 и 20 август.

Според Конкурсот на УКИМ, на 23-те факултети во негов состав слободни се вкупно 9719 места. Од нив, 4683 за редовни студенти во државната квота, 4081 места за редовни со кофинансирање на студиите и 955 за вонредни студенти.

Како и во минатите години, најмногу слободни места има за упис на студиските програми на Факултетот за информатички науки и компјутерско инженерство-ФИНКИ (1020), Природно-математичкиот факултет (910), Филозофски факултет (880), Филолошки (810), Медицински факултет (760), Економски (700), Правен факултет (610), Факултет за електротехника и информациски технологии-ФЕИТ (590).

Редовните студенти кои се финансираат од државниот буџет ќе плаќаат партиципација од 200 евра, а тие со кофинансирање на студиите и вонредните ќе плаќаат по 400 евра.

Во објавениот Конкурс на УКИМ се наведени условите и критериумите за запишување, роковите, потребните документи и начинот на аплицирање.

Пред пријавувањето во роковите утврдени со Конкурсот, секој заинтересиран кандидат треба да се регистрира и да ја пополни електронската пријава од „iKnow“ системот.

Откако ќе помине првиот рок следниот вторник и среда, вториот рок ќе биде на 11 и 12 септември, а третиот рок каде што ќе има слободни места ќе биде на 24 септември.