По судирот на Володимир Зеленски со Доналд Трамп и Џеј-Ди Венс во Белата куќа, поранешниот украински претседател Петро Порошенко застана на страната на актуелниот претседател. Иако со години е еден од неговите најжестоки критичари, Порошенко сега ја нагласува потребата за единство додека Украина се соочува со неизвесност околу американската воена помош.

„На Украина и треба единство“, рече Порошенко, според „Украинска правда“.

Порошенко беше претседател на Украина од 2014 до 2019 година и ја водеше земјата низ првите години на руската агресија. Како истакнат политичар и бизнисмен, тој често го критикуваше Зеленски за неговото водење војна и домашната политика, но по неодамнешните настани во Вашингтон, тој нагласи дека Украина мора да остане обединета пред надворешните притисоци.