Националната галерија на РС Македонија со години наназад несебично ја искажува својата општествена одговорност со подавање рака на тие на кои им е најпотребна. Преку едукативен пристап Националната галерија со години наназад таргетира и анимира деца од ранливите групи, со различен спектар на попреченост во синергија со ученици од редовниот курикулум. Овие културолошко-социјални и инклузивни проекти се дел од Програмата на Националната галерија и во целост се поддржани од Министерството за култура. Во изминатиот период (2017-2019) на оваа национална установа ѝ беше доделен грант од Амбасадата на Кралството Холандија наменет за едукација на ранливите групи од претшколска и школска возраст.

Како продолжение на претходниот, на почетокот на месецот во просториите на Чифте амам беше потпишан меморандум за соработка меѓу Националната галерија и Посебното основно училиште „Иднина“ од Скопје.

– Учениците од ПОУ „Иднина“ се редовни учесници во креативните работилници во организација на нашата институција и се едни од најкреативните млади уметници. Со потпишување на меморандумот подготвени сме да им дадеме целосна поддршка и продолжуваме со нови проекти, со цел поттикнување и развој на креативноста, како алатка за интелектуален и психофизички развој и напредок. Оваа година ќе го поддржиме нивниот патронен празник и заеднички ќе ги одбележиме битните датуми во текот на годината – изјави д-р Дита Старова Ќерими, директорка на Националната галерија.

Претставниците од училиштето, покрај благодарноста, порачаа дека во досегашното искуство со Националната галерија препознаваат силна поддршка на институционално ниво и позитивен пример што не треба да биде единствен и изолиран.

(Текстот е објавен во „Културен печат“ број 22, во печатеното издание на „Слободен печат“ на 14-15 март 2020)