Некој намерно ги исекол каблите на Железничкиот мост во Карпош, Град Скопје поднесе пријава за саботажа
Град Скопје заедно со Општина Карпош, денеска поднесе пријава против непознат сторител поради оштетување на јавен имот и саботажа откако на т.н. „Железнички мост“ на улицата „Војвода Васил Чакаларов“ во населбата Хром, во текот на минатата вечер намерно се исечени и оштетени електрични и комуникациски кабли.
Не сакаме да веруваме дека станува збор за намерна саботажа предизвикана од политичка агенда, но, ако судиме по реакциите на политичките партии кои го политизираа и пожарот на мостот „Беласица“ со шпекулации и предизвикување на општа несигурност и паника кај граѓаните, заклучокот е загрижувачки – велат од Град Скопје.
Оттаму апелираат до сите институции да ги преземат сите неопходни мерки за да се спречи ваквата појава, како и до сите политички чинители да не поттикнуваат вакво однесување.