Македонскиот камерен состав „Аура“, по покана на меѓународниот фестивал БУНТ (Белградска уметничка нова територија), на 11 декември одржа целовечерен концерт во Белград. Триото се претстави со дела од Лефевр, Коетсиер, Димушевски и Пјацола, а концертот се одржа во познатата сала „Гуарнериус“.

Триото „Аура“ го сочинуваат тројца истакнати македонски музички уметници: флејтистот Страшо Темков, пијанистката Ана Гацева и фаготистот Марјан Милошевски. Сите работат како професори на Факултетот за музичка уметност во Скопје. Имаат реализирано многубројни рецитали, како солисти и камерни музичари, во Америка, Франција, Германија, Австрија, Англија, Бугарија, Азија, Африка, Србија, Словенија, за кои добиваат позитивни оценки.

Критиката ги нарекува „мајстори на својот инструмент“, а поради забележителните концерти во својата земја и во странство, тие несомнено се вбројуваат меѓу најдобрите и најактивните музички изведувачи во Македонија. Триото често изведува премиерни дела од македонски композитори, напишани специјално за овој состав. Нивното заедничко камерно музицирање, го карактеризираат изразено чувство за експресивност, музичка симбиоза и компактност на звукот и изразот.

(Текстот е објавен во „Културен печат“ број 60, во печатеното издание на „Слободен печат“ на 12-13 декември 2020)