Пред десет години на денешен ден почина Ејми Вајнхаус, а како официјална причина за нејзината смрт беше наведено труење со алкохол во комбинација со здравствени компликации.

Вајнхаус беше позната по својот експресивен вокал, а во своите песни создаваше уникатен микс на соул, блуз и џез. Првиот албум „Frank“ во 2003 го привлече вниманието на јавноста и доби многу позитивни критики, а вториот студиски албум „Back to Black“ ѝ донесе дури пет Греми награди.

Но, покрај успешната музичка кариера, Ејми беше позната и по нејзиното скандалозно однесување додека се бореше со зависноста од алкохол и наркотици, особено во текот на бракот со Блејк Филдер Сивил.

Талентираната пејачка неколкупати беше хоспитализирана поради предозирање со лекови и наркотици, а се борела и со депресија и нарушувања во исхраната. Меѓу другото, страдала и од респираторни проблеми. Во текот на 2008 година, Вајнхаус се соочила со низа здравствени компликации што претставувале сериозна закана за нејзината кариера и за нејзиниот живот.

Нејзината култна песна „Rehab“ била создадена сосема случајно во студиото, додека ѕвездата му се жалела на својот продуцент дека нејзините родители и пријатели ја принудуваат да започне со третман за лечење зависност од алкохол. Последниот концерт на пејачката се одржа во Белград, а траел само 11 минути бидејќи таа не била во добра состојба.

Нејзиното тело на 23 јули го пронашле нејзините телохранители, кои воедно потврдиле дека во последните неколку денови од животот пејачката била често во алкохолизирана состојба, се смеела, слушала гласна музика и гледала телевизија.

Според резултатите од аутопсијата, доколку не страдала од булимија, пејачката би можела полесно да ги поднесе последиците од злоупотребата на лекови и наркотици, но нејзиното слабо тело не успеало да го издржи тој товар.