Германската амбасадорка Холштајн за СП: За Германија е незамисливо за Албанија да каже да, а С. Македонија да ја остави
За Германија е незамисливо само за Албанија да даде зелено светло за преговори со ЕУ, а за Северна Македонија не, вели германската амбасадорка Анке Холштајн за „Слободен печат“.
– За решавачки насоки во процесот на проширување на ЕУ потребна е согласност од сите земји-членки. Исто како што преговарачката рамка може да биде само едногласно прифатена, датум за првата меѓувладина конференција ќе има само кога сите земји-членки ќе дадат согласност. За Германија не е замисливо само за Албанија да даде зелено светло, а Северна Македонија да ја остави. Северна Македонија веќе одамна ги исполни сите услови за започнување на пристапните преговори, нејзниот почеток е заслужен и одамна задоцнет. Ова е исто така во интерес на веродостојноста на процесот на проширување и на веродостојноста на ЕУ во регионот – вели германската амбасадорка Холштајн за „Слободен печат“.
Еврокомесарот за проширување Оливер Вархељи неколку пати деновиве го изнесе ставот дека за Брисел е прифатливо Албанија и Македонија да бидат раздвоени на патот кон ЕУ, но неговиот став веднаш беше демантиран од функционери од Германија, но и од Словачка.
Германскиот министер за Европа Михаел Рот објави дека неговата земја се залагаат Македонија и Албанија во јуни заедно да ги почнат преговорите.
– Германија ја поддржува целта на португалското претседателство со ЕУ да се одржи првата меѓувладина конференција со Албанија и Северна Македонија во јуни. Двете земји ги испорачаа бараните реформи, сега мора и ЕУ да испорача. Понатамошното одложување ги поткопува кредибилитетот на ЕУ и стабилноста на регионот – напиша Рот на Твитер.
Словачкиот министер за надворешни работи Иван Корчок напиша дека Советот на ЕУ треба да го тргне ветото што Бугарија го стави за Македонија.
– Кредибилна политика за проширување на ЕУ сега значи отфрлање на ветото во Советот, кој треба да го признае напредокот на С. Македонија и Албанија. Одржувањето на меѓувладините конференции со двете земји веќе многу доцни – напиша Корчок.