Генчовска објави детали за пироманот во Битола: Дојде со велосипед, ладнокрвно и смислено ја запали вратата

Изгорената врата на клубот Иван Михаилов во Битола/Фото: Скриншот

Бугарската шефица на дипломатијата Теодора Генчовска која престојува во дводневна официјална посета на земјава вчера имала средба и со директорот на битолската полиција од кого побарала информација за пожарот на влезната врата од Центарот за култура „Иван Михаилов“ во Битола.

-Штом дознав на нашата средба со Бујар Османи за палењето на домот за култура, заминав за Битола. На лице место се сретнав со директорот на битолската полиција. Ви благодариме за брзата реакција и на противпожарната бригада и на полицијата, дежурниот обвинител. Директорот на полицијата се обврзува да вложи максимални напори за откривање на сторителот на овој немил чин и вандалски чин, изјави бугарската министерка за надворешни работи Теодора Генчовска за БГНЕС.

Таа изјави дека очекува судството во РСМ ќе си ја заврши работата и додава што се гледа на снимките кои и биле презентирани во битолската полиција.

– На снимките на една од камерите можев да видам човек кој мирно пристигнува со велосипед, вади цевка со запалива течност и мирно ја истура течноста пред вратата од куќата. Оваа смиреност беше малку нарушена, бидејќи пожарот што избувна беше огромен, се исплаши, се сомневам дека лицето има некои повреди од овој пожар, можеби ќе побара лекарска помош. Човекот носи маска, рече Генчовска додавајќи дека лично смета дека ова „дело е направено ладнокрвно, смислено и намерно“.

Таа не верува дека овој инцидент ќе влијае на односите на Бугарија со PCM.

-Не би рекла дека има пожар во нашите односи со РС Македонија, рече Генчовска. Во моментов нашите односи се нормално конструктивни, има нормален работен дијалог. Двата тима работат напорно и потребни се многу часови, продолжуваме да се обидуваме да најдеме решение за отворените прашања во спроведувањето на Договорот за добрососедство, коментира бугарската министерка за надворешни работи.

Според неа огнот е израз на говор на омраза.

-Нашите очекувања се дека РСМ и нејзината влада ќе имаат конзистентна и сеопфатна политика за надминување на говорот на омраза, нагласи Генчовска. Оптимисти сме за постигнување резултати – кога и како е во прашање подготвеноста на колегите од владата на РС Македонија да ги спроведат овие договори, рече Генчовска за БГНЕС.

 

Видео на денот