Алжирскиот интернационалец Гедбан и клубот ја активираа клаузулата според која доколку и двете страни се задоволни, тој ќе остане уште најмалку една година во Скопје.

Тој е првиот ракометар од Алжир како дел од тимот на Вардар и воопшто прв играч од Африка што игра за „црвено-црните“. Дојде како млад и перспективен ракометар кој на повеќе натпревари го покажа квалитеот што го поседува.

Со екипата на Вардар стигна до четири трофеи сезонава, во домашното првенство, домашниот Супер куп, СЕХА Газпром лигата и ЕХФ Лигата на шампионите.

– Калифа во Вардар сезонава со своите настапи покажа многупати дека е квалитетен голман. Ние одамна го препознавме тој квалитет и веруваме дека неговите игри ќе бидат уште подобри. Со младоста, квалитетот и посветеноста ветува дека ќе израсне во врвен играч. Задоволни сме што и тој останува во Скопје и што заедно ќе одиме во уште една сезона и ќе го напаѓаме европскиот врв – изјави Давор Стојаноски, извршниот директор на Вардар.

Претходно соработката со клубот ја продолжи и словенечкиот организатор на играта, Сташ Скубе.