Следните три дена илјадници волонтери ќе ја чистат државата. Започна досега најмасовната екоакција „Генералка викенд во државата и на Балканот. Од денеска до недела десетици илјади волонтери ќе чистат јавни површини и диви депонии на повеќе од 500 локации, во над 80 општини.

Покрај чистењето, фокусот е ставен и на подигање на јавната свест и поттикнување на селекција и рециклирање на отпадот. Пораката останува јасна – грижата за животната средина треба да стане секојдневна навика, а не само еднократна акција.

Во акцијата се вклучија и претседателката Гордана Сиљановска-Давкова, градоначалникот на Скопје Орце Ѓорѓиевски, министерот за животна средина Муамет Хоџа и неговата заменичка Ане Лашкоска, амбасадорот на Австрија Мартин Памер.

Екоакцијата е организирана и поделена во осум тима, на потегот од реката Лепенец до мостот „Киро Глигоров“ ќе бидат распоредени на северната и јужната страна на реката Вардар. Во соработка со Комунална хигиена и Паркови и зеленило ќе бидат мобилизирани стотици волонтери од приватни компании, институции и училишта за да ја исчистат најголемата зелена и рекреативна зона во главниот град.

Организаторите од „Мен енд Маунтен“ очекуваат рекордна вклученост на институции, компании и граѓани.

Екоакцијата е волонтерска иницијатива, каде што учесниците се одговорни за сопствената безбедност и стана најголемата еколошка акција досега во нашата земја.