Иранските власти ги отфрлија пораките на поранешниот израелски министер за одбрана Јоав Галант, кој во отворено писмо до Врховниот лидер на Иран, Али Хамнеи, тврди дека во јунските напади, Израел сериозно го оштетил иранскиот воен систем, кој „Исламската Република го гради со децении“.

Канцеларијата на Врховниот лидер на Иран, Али Хамнеи, го нарече писмото „пропаганда“ и „психолошка операција“, објави „Иран Интернешнл“.

Во писмо од 9 јули, Галант тврди дека Израел, во неодамнешниот 12-дневен конфликт, уништил клучни ирански воени и нуклеарни објекти, убил високи команданти и докажал целосна разузнавачка супериорност над Иран.

„Она што се случи во јуни не беше само воена кампања, туку стратешки колапс на систем што го градевте 40 години“, рече Галант, додавајќи дека секој нов обид за развој на нуклеарна програма би предизвикал нови израелски напади.

Иранските власти тврдат дека писмото има за цел да влијае на јавното мислење, како во Иран, така и во странство. Во јунскиот конфликт, израелските напади погодија повеќе цели во Иран, додека иранските ракетни напади убија 27 израелски цивили.