Со одигрувањето на натпреварите од вториот круг се комплетираше втората фаза од сезоната во Првата македонска фудбалска лига, по што е познат и распоредот за последниот дел од шампионатот.

Според позициите на табелата и Бергеровиот систем, беа одредени двојките за третиот, решавачки круг од сезоната, во кој ќе се решаваат најважните прашања, шампионот, местата за Европа и борбата за опстанок.

Најповолна позиција во моментов има лидерот Вардар, кој клучниот дерби-натпревар против Шкендија ќе го одигра на домашен терен, и тоа во последното коло од првенството.

Финишот од сезоната ветува големи возбудувања, бидејќи директните пресметки меѓу конкурентите за врвот се закажани токму во завршните кола. Така, во 31. коло Шкендија ќе ја пречека Струга, а веќе во следната рунда стружани ќе му бидат домаќини на Вардар, непосредно пред финалното коло кое може да ја донесе конечната разврска во шампионатот.