ФОТО: Македонскиот репрезентативец Чурлинов тренира во боите на Штутгарт
Минатата сезона како позајмица од Штутгарт, Дарко Чурлинов придонесе тимот на Шалке да се врати во Бундеслигата.
Навивачите посакуваа македонскиот репрезентативец и следната сезона да настапува во Гелзенкирхен, но раководството не плати три милиони евра колку што бараа од Штутгарт за услугите на нашиот играч.
Штутгарт успеа да обезбеди опстанок во елитата, па сигурно беше дека повторно ќе имаме Македонец во Бундеслигата, една од Топ 5 европските лиги. Чурлинов веќе тренира со тимските соиграчи на Штутгарт за новата натпреварувачка сезона.
Во првото коло од најсилниот германски шампионат на 7 август на домашен терен фудбалерите на тренерот Пелегрино Матарацо ќе играат против Лајпциг.
Од 2019 година нашиот репрезентативец ги брани боите на Штутгарт, во првата сезона во втората Бундеслига имаше шест настапи и еден гол. Потоа во сезоната 2020/2021 во најдобрата Бундеслига запиша 14 настапи. Лани беше само еднаш на клупата, па беше испратен на позајмица во Шалке со 22 настапи и два голови.
