Филмот „Една битка по друга“ (One Battle After Another) беше прогласен за најдобар филм на синоќешното доделување на престижните награди од изборот на филмските критичари за 2025 (Critics’ Choice Awards). Меѓу најголемите добитници на вечерта беше и филмот „Грешници“ (Sinners), „К-поп ловци на демони“ (KPop Demon Hunters), „Студиото“ (The Studio), „Адолесценција“ (Adolescence) и емисијата „Џими Кимел во живо“ (Jimmy Kimmel Live!), пренесува „Холивуд репортер“.

Покрај наградата за најдобар филм, Пол Томас Андерсон (Paul Thomas Anderson) ја освои наградата за најдобар режисер за „Една битка по друга“ (One Battle After Another).

Филмот „Грешници“ (Sinners) освои вкупно четири награди, меѓу кои и новововедената категорија за најдобар кастинг и ансамбл, која ѝ припадна на Франсин Мејсл. Мајлс Кејтон беше прогласен за најдобар млад актер/актерка, Рајан Куглер ја доби наградата за најдобро оригинално сценарио, а Лудвиг Горансoн за најдобра филмска музика.

Во актерските категории, Тимоти Шаламе победи за најдобар актер за улогата во „Марти Суприм“ (Marty Supreme), додека Џеси Бакли беше прогласена за најдобра актерка за „Хамнет“ (Hamnet).

Џејкоб Елорди  ја освои наградата за најдобра споредна машка улога за „Франкенштајн“ (Frankenstein), а Ејми Медиган за најдобра споредна женска улога за „Оружја“ (Weapons).

Во категориите за лимитирани серии (limited-series), наградите за актерска игра ги добија Сара Снук за „Сè е нејзина вина“ (All Her Fault), како и Ерин Дохерти, Стивен Греам и Овен Купер за „Адолесценција“ (Adolescence), која воедно ја освои и наградата за најдобра лимитирана серија.
Емисијата „Џими Кимел во живо“ (Jimmy Kimmel Live!) беше прогласена за најдобро ток-шоу.

Кај драмските серии, актерските награди им припаднаа на Ноа Вајл и Кетрин ЛаНаса за „Пит“ (The Pitt), Трамел Тилман  за „Северанс“ (Severance) и Реа Сихорн за „Плурибус“ (Pluribus).

Серијата „Студиото“ (The Studio) ја освои наградата за најдобра комична серија, а актерските признанија во оваа категорија ги добија Сет Роген и Ајк Баринхолц, како и Џин Смарт за „Хакови“ (Hacks) и Џанел Џејмс за „Основно училиште Абот“ (Abbott Elementary).

Песната „Golden“ од филмот „К-поп ловци на демони“ (KPop Demon Hunters) беше прогласена за најдобра песна, а самиот филм ја освои наградата за најдобар анимиран филм.

Водителка на церемонијата по четврти пат по ред беше Челзи Хендлер. Оваа година беа воведени и четири нови категории: покрај кастинг/ансамбл, додадени се награди за најдобра вариететна серија, каскадерски дизајн и звук.

Доделување на наградите од изборот на филмските критичари за 2025 (Critics’ Choice Awards) се одржа во Barker Hangar во Санта Моника, а беше пренесувано во живо на „E!“ и „USA Network“.