Фудбалската репрезентација на Македонија одигра нерешено без голови (0:0) против Република Ирска во дуел на двете селекции што останаа без мундијалски билет по полуфиналниот бараж за СП 2026.

За разлика од болниот пораз во Копенхаген, овојпат избраниците на Гоце Седлоски делуваа поорганизирано и постабилно во дефанзивата, но натпреварот во целина мина во помирен ритам, без вистинска тензија и динамика.

За националниот тим во делот на одбраната дебитираше играчот на ФК Шкендија, Имран Фетаи:

– Многу сум задоволен, како за прв натпревар мислам дека одиграв добро и се надевам дека ќе продолжам така и во следните репрезентативни мечеви. Знаеме дека Република Ирска е многу цврст противник и ние мораше да играме на таков начин, цврсто, силно и така игравме. Игравме добро како тим, противникот немаше некои шанси, но и ние немавме. Играта беше тврда и на крајот сме задоволни од ремито – рече Фетаи по мечот со Ирците.