Федерален судија во Њујорк пресуди дека Министерството за правда на САД може јавно да ги објави записите од големата порота од случајот за трговија со луѓе против озлогласениот сексуален предатор Џефри Епстин од 2019 година, пишува Ројтерс.

Одлуката на судијата Ричард Берман ја поништува неговата претходна одлука дека материјалот треба да остане таен и се повикува на нов закон што бара од министерството да ги објави досиејата до крајот на следната недела.

Епстин беше обвинет за трговија со луѓе во јули 2019 година, а еден месец подоцна се самоуби во својата затворска ќелија во Њујорк додека чекаше судење.

Одлуката доаѓа само еден ден откако друг судија донесе слична одлука во случајот со Гислеjн Максвел, која беше осудена во 2021 година за нејзината улога во олеснувањето на злоупотребата на Епстин.

Клучен за оваа одлука е Законот за транспарентност на записите на Епстин, кој беше потпишан од американскиот претседател Доналд Трамп минатиот месец. Тој му наредува на Министерството за правда да го објави целиот истражен материјал поврзан со Епстин, кој вклучува некласифицирани записи, документи и комуникации, до 19 декември.

Во својата пресуда, судијата Берман нагласи дека жртвите имаат право да „го заштитат својот идентитет и приватност“, додавајќи дека нивната „безбедност и приватност се од најголема важност“.

Сепак, законот му дозволува на одделот да го задржи објавувањето на тие досиеја поврзани со активни кривични истраги или што би можеле да покренат загриженост за приватноста на поединците.

Трамп сега вели дека сака досиејата на Епстин да излезат на виделина

„Трамп знае за девојките“ – демократите објавија нови детали за врската меѓу Епстин и американскиот претседател