Естонија ќе ја има публиката против најдобрите македонски кошаркари!
Квалификациските натпревари од групата „Б“ за пласман на Европското првенство во 2022 година, кои се планирани да се играат во периодот од 28-30 ноември 2020 година, ќе се играат со присуство на публика.
Иако здравствените прилики во Европа, но и во целиот свет, се далеку од идеални, во последно време е забележан е пораст на заразени со коронавирусот, организаторот на „балонот“ во Талин (Естонија), доби дозвола од ФИБА, мечевите да бидат со присуство на гледачи.
Секако, со строго контролиран протокол кој вклучува задолжително носење на заштитни маски на сите присутни во салата „Саку Сурхал“ во Талин. Контролирани влегување во објект на комплетно прегледани посетители, и соодветен простор за хендикепирани лица.
Кошаркарската федерација на Естонија ги објави и цените на билетите за натпреварите. Ќе се продаваат одвоено, односно за секој од предвидените четири натпревари на турнирот.
Па така, влезниците за средбата Италија-Македонија, која ќе се игра на 28 ноември (сабота), ќе чинат од 9 до 11 евра. Многу поскапи ќе бидат оние за мечот во кој домаќинот, Естонците ја пречекуваат селекцијата на Русија. Цените на билетите се движат од 25.80 до 40.80 евра.
Слична е и ситуацијата за вториот натпреварувачки ден на собирот, за средбата Русија-Италија ќе се плаќа од 16.80 до 30.80 евра, додека нашиот најважен натпревар за време на турнирот, оној против Естонија ќе може да се гледа „во живо“, доколку се плати од 25.80 до 40.80 евра.