Ердоган: Најголема чест е да бидам запаметен како претседател кој ја направи Света Софија повторно џамија
Претворањето на Света Софија во џамија како личен успех го спомена во говорот синоќа турскиот претседател Реџеп Таип Ердоган, по повод доделувањето на ликовните награди во Истанбул.
Предметните награди се востановени во спомен на милитантниот исламистички турски поет Неџип Фазил Кисакиурек, кој беше жесток борец за повторното отворање на Света Софија како џамија и политички се судри со кемалистичкиот естаблишмент.
„37 години по неговата смрт (на поетот), ја имавме честа да ја отвориме Света Софија, што беше неговиот најголем сон. Слава му е на Алах. По 80 години копнеж заедно ги скршивме синџирите и ја вративме Света Софија во првобитната форма, по желба на Освојувачот“, рече турскиот претседател од говорницата на настанот.
„Уште еднаш го фалам мојот Господ што ни ја даде оваа чест, ова достоинство да го прославиме крајот на заробеништвото на Света Софија“, рече тој и додаде: „Да се биде запаметен како претседател кој повторно ја отвори Света Софија е најголема чест во светот за нас“.
Претседателот Ердоган, исто така, рече дека оние кои ќе ја заштитат Света Софија се младите, кои поединечно ќе одговорат на повикот.
„Се додека тоа се случува, ако даде Господ, никогаш нема да престане звукот на Куранот од куполите на Света Софија и повикот за молитва од неговите минариња. Големата џамија Света Софија ќе продолжи да ги привлекува срцата на верниците засекогаш како симбол на турскиот век“, додаде тој.