Денеска шпанскиот клуб Рајо Ваљекано го потврди трансферот на колумбискиот интернационалец Радамел Фалкао или популарниот „Ел Тигре“.

Овој 35-годишен напаѓач одлучи повторно да игра во Шпанија доаѓајќи како слободен агент откако го раскина неговиот договор со турскиот Галатасарај.

Фалкао ќе биде соиграч на нашиот Столе Димитриевски, кој моментно е со македонската А репрезентација за настапите во квалификациите за Светското првенство 2022.

Во својата клупска кариера играше за врвни клубови како Порто и Атлетико Мадрид со кои ги имаше најголемите успеси.

Со португалската екипа ја освои Лига Европа во сезоната 2010/11, а на врвот во истото натпреварување се искачи и со „јорганџиите“ со кои исто така дојде до титули во „Копа дел Реј“ и УЕФА Суперкупот.

Со Монако во Франција беше шампион во сезоната 2016/2017, и освојувајќи низа бројни индивидуални признанија.

Рајо Ваљекано после три кола во „Ла Лига“ има три бода и е на 10 место во генералниот пласман.