„И моите деца, како и сите граѓани, ги уживаат сите права и можности во државата“, изјави претседателот на Собранието Талат Џафери по веста дека Академијата за судии и јавни обвинители ја завршил и неговиот син Барлет Џафери, за кого беше откриено дека полагал и положил правосуден испит без воопшто да има завршен факултет.

„Јас сум свесен како претседател на Собранието и како носител на јавна функција сензацијата е поголема кога се работи за член на семејството на носител на јавна функција. Антикорупциската комисија имаше постапка и таа е запрена, односно не можеше да се утврди злоуотреба од страна на син ми. Работата на институциите е друга работа и тоа не не засега ни мене ни, мојот син. Во секој случај како сите граѓани во државата, така и моите деца ги уживаат сите права и можности во ова општество“, изјави Џафери.

Освен синот на Џафери и други синови, снаи и роднини на политичари и судии ја завршија Академијата за судии и обвинители. На спсиокот се и Билјана Иванова, снаа на генералната секретарка на Собранието, Цветанка Иванова, а јавна обвинителка ќе биде и Албулена Абази, сопругата на шефот на Обвинителството за гонење организиран криминал и корупција, Ислам Абази. Кандидатката за судијка, Симона Муцунски-Бубевска е сопруга на градоначалникот на Аеродром и потпретседател на ВМРО-ДПМНЕ, Тимчо Муцунски.

Меѓу новите кадри кои ќе правораздаваат има и синови на судии и обвинители – Драган Јосифовски, син на обвинителката Елизабета Јосифовска, кој ќе биде иден судија. Јавен обвинител ќе биде Јетмир Беџети, а синот на судијата од скопска Апелација, Енвер Беџети.

Последната генерација на судии и обвинители предизвика интерес откаково јавноста се дозна дека синот на Џафери предвреме полагал правосуден испит.