Традиционалната меѓународна поетска манифестација „Празник на липите“ на Друштвото на писателите на Македонија (ДПМ) се одржа на 28 јуни. Манифестацијата била основана од писателите Светлана Христова-Јоциќ, Христо Петрески и Јордан Даниловски.

Настанот е инспириран од липите како симбол на градот Скопје. Липите и нивниот опоен мирис се белег на Скопје и се инспирација за поетите да пишуваат поезија на оваа тема.

Добитници на убавата награда „Книжевен жезол“ за 2022 година се поетот Аднан Озер од Турција и Гордана Михаилова – Бошнакоска од Македонија.

На настанот беше промовирана заедничка книга „Бесконечното“ од Гордана Михаилова-Бошнакоска и „Поезија“ од Аднан Озер. Промотивни беседи за наградените автори имаа академик Влада Урошевиќ и Ерол Туфан.

Аднан Озер е поет, преведувач, книжевен критичар, есеист, уредник и издавач од Турција. Долг период бил новинар, уредник и основач на значајни издавачки куќи и весници. Досега повеќепати бил во Македонија на СВП и на Рацинови средби. Гордана Михаилова-Бошнакоска е поетеса, раскажувачка и есеистка. Академик Влада Урошевиќ истакна дека таа е „посебна личност во мозаикот на македонската поезија“.

Манифестацијата „Празник на липите“ содржи и конкурс за песна или краток есеј на тема: липа. На конкурсот пристигнале повеќе песни, а жири-комисијата во состав Васил Тоциновски, Југослав Петровски и Пунторие Муча Зиба едногласно одлучи наградата да ја понесе песната „Градот, рајот“ од Стефан Марковски.

(Текстот е објавен во „Културен печат“ број 135, во печатеното издание на весникот „Слободен печат“ на 2-3 јули 2022)