Во просториите на НУЦК „Бели Мугри“ – Кочани од 21 ноември е поставена ретроспективната изложба „Бучава што создава идентитет“, посветена на 60 години македонска рок-култура, музика и поезија (1963–2023).

Изложбата претставува визуелна и документарна приказна за развојот на македонската рок-сцена, преку внимателно одбрани фотографии од легендарни бендови, портрети на нивните фронтмени, како и уникатни рачно испишани текстови на песни – автентични документи кои ја носат енергијата, естетиката и духот на различните генерации што ја градеа оваа музичка традиција.

Сите фотографии се поставени на канвас, а текстовите на песните се презентирани во нивната оригинална форма – како што биле напишани од музичарите, фотокопирани но и оригинални исписи ставени во рамки. Овој дијалог помеѓу слика, звук и збор овозможува ретко и интимно доживување на културниот развој на македонската рок сцена.

– „Бучава што создава идентитет“ не е само изложба – таа е потсетник на богатото творештво што низ децении го обликуваше современиот македонски културен пејзаж. Изложбата е дел од пошироките активности за зачувување и валоризација на македонското музичко наследство – истакнуваат организаторите.

Со поддршка на Министерството за култура и туризам и НУЦК „Бели Мугри“ во Кочани, организатори на изложбата се „Корпус Деликти Рекордс“ и Македонски рок-музеј, архив и библиотека.

(Текстот е објавен во „Културен печат“ број 308, во печатеното издание на весникот „Слободен печат“ на 22-23.11.2025)