Центарот за заедничка основа (ЦЗО) во соработка со Националниот комитет за спречување на насилен екстремизам и борба против тероризам на 12 март во хотелот „Холидеј ин“ во Скопје организираше премиерна проекција на документарниот филм „Скршени синџири: враќање по ИСИС“.

Филмот се базира на вистински приказни на две жени и нивните деца кои се вратиле од Сирија и Ирак, поминувајќи низ тешки предизвици на издржливост и одлучност. Со помош на државата вратени се во татковината и успешно се реинтегрирaни во своите локални заедници.

Воведни зборови за проектот и за проекцијата на документарниот филм имаа Вилма Венковска Милчев, претседател на ЦЗО, и Златко Апостолоски, Национален координатор за спречување на насилен екстремизам и борба против тероризам.

Филмот е направен во рамките на проектот „Градење отпорни и инклузивни заедници“, финансиран од Глобалниот фонд за ангажираност и отпорност на заедниците (GCERF).

Главната цел на проектот е да се изградат отпорни локални заедници против насилниот екстремизам и радикализација, преку градење на капацитети и поддршка на заедниците и ранливите групи во процесот на превенција/ борба против насилниот екстремизам, како и реинтеграција и рехабилитација на повратниците и нивните семејства.

Со цел да се заштити идентитетот на вистинските протагонисти, во филмот играат актерки. Режисерка на филмот е Сибел Абдиу, а реализиран е од „Машина продукција“.

(Текстот е објавен во „Културен печат“ број 222, во печатеното издание на весникот „Слободен печат“ на 16-17.3.2024)