Екипите кои се натпреваруваат во Бундеслигата би сакале да им овозможат на навивачите да се вратат на стадионите од почетокот на новата сезона на 18 септември.

На состанокот кој се одржа во вторникот, клубовите изразија желба на навивачите да им се дозволи да присуствуваат на натпреварите од стартот на натпреварувачката сезона 2020/2021. Во извештаите не е наведено колку луѓе би можеле да присуствуваат на трибините од следниот месец.

На гостинските навивачи и натаму нема да им биде дозволен влез на стадионите барем до крајот на 2020 година.

Оваа одлука допрва треба да биде потврдена од надлежните органи. Средба со министерот за здравство ќе се одржи следниот понеделник.

– Дали и кога навивачите ќе се вратат на стадионите не е одлука што ние ја донесуваме, туку политичките власти. Не можеме да бараме ништо, туку полека да работиме на тоа за да бидеме подготвени. Нема магија која ќе ни овозможи веднаш да ги наполниме трибините. Само внимателно ќе се враќаме кон нормалноста – рече Кристијан Сејферт, извршниот директор на германската фудбалска лига (ДФЛ).