Oткако утрово беше објавено дека Државната комисија за сперчување на корупција побарала кривична пријава за Наумче Мојсовски кој е претседател на Агенцијата за Млади и спорт се огласи и првиот човек на МОК Даниел Димевски.

Димевски испрати уште еден удар за македонската ракометна легенда барајќи негова смена и стопирање на ваучерите за 2023 година. Писмото Димевски го испрати до вицепремиерката Славица Грковска и во него укажува на лошо работење на АМС.

„Почитувана Г-ѓа Грковска, веруваме дека со должно внимание сте го прочитале Конечниот Извештај на Државниот завод за ревизија каде прецизно се констатирани сите незаконски дејанија кои за жал се пракса во работењето на раководството на АМС. Внимавајте, се работи за милионски суми распределени без никаква контрола и механизми. Веруваме дека ве загрижува фактот што од страна на Агенција за заштита е правото на слободен пристап до информациите од јавен карактер, АМС е рангирана на катастрофално 115 од 120 места како крајно нетранспарентна организација, што само по себе многу кажува!“,

Ја повикуваме Владата и вас лично како најодговорен функционер за оваа сфера, да го исполните јавно даденото ветување за чесно, одговорно и транспарентно работење на од Вас избраните и поставени функционери и да го разрешите директорот и комисиите поставени од него и да назначите нови, чесни и професионални лица кои доследно ќе го применуваат законот, правилниците и критериумите за доделување на средства на сите спортски субјекти. Со оглед на тоа што во моментов тече постапката за доделување на ваучери за 2023 година, бараме ИТНО ЗАМРЗНУВАЊЕ НА ПОСТАПКАТА, се до именувањето на новите членови на Централната комисија. Одговорноста за брза и ефективна реакција е Ваша и е исклучиво во Ваши раце и нема простор за префрлање на вината кај нефункционалниот судски систем“, стои во писмото од Димевски.