Динамо Загреб од 20.45 часот вечерва во Атина требаше да го игра првиот натпревар од третото квалификациско коло во Лигата на шампионите против АЕК. Истиот е одложен од УЕФА поради големите навивачки нереди претходната вечер, во кои загина навивач на АЕК, а тешко беа повредени уште неколку навивачи од двете страни.

Европската фудбалска унија информираше дека првиот натпревар ќе се игра на 15 август во Загреб, а реваншот во Атина на 19 август.

Македонскиот репрезентативец Стефан Ристовски и неговите соиграчи, како и стручниот штаб ја напуштија Атина и се вратија во Загреб. Таму ги пречекаа новинари и неколку навивачи, но ниту еден играч или член на клубот не сакаше да даде изјава за медиумите, тие само дадоа неколку автограми.

Претседателот на Динамо Загреб, Мирко Баришиќ претходно ѝ се обрати на јавноста:

– ГНК Динамо најостро ги осудува немилите настани што се случија синоќа во Атина. Во име на клубот и во мое лично име, изразувам најискрено сочувство до семејството и родителите на починатиот млад човек. Исто така, изразувам сочувство и жалење за нашите спортски пријатели во АЕК.

Овде морам да истакнам дека Динамо упорно ќе продолжи да соработува со УЕФА за да не само да се спречат вакви настани, туку и да не се ни помислува на такви нереди. Убеден сум дека ќе успееме во тоа, а соработката со УЕФА ни дава поттик да истраеме во тоа. Нашата јавност ќе биде информирана за одигрувањето на следниот натпревар во продолжението од квалификациите за Лигата на шампионите – рече Баришиќ.