Кошаркарите на Баерн Минхен запишаа важна победа над Алба Берлин со 85-79 во рамки на 31. коло од германското првенство, а солиден настап имаше и македонскиот репрезентативец Ненад Димитријевиќ.

Домаќините подобро го отворија мечот и на полувреме заминаа со предност од 42-37, но гостите од Берлин покажаа карактер и на стартот од третата четвртина направија целосен пресврт, поведувајќи со 48-44.

Алба долго време ја одржуваше предноста, но во последниот период Баерн заигра значително поагресивно и со серија поени успеа да го сврти резултатот во своја корист и да стигне до триумф.

Најефикасен кај победникот беше Андреас Обст со 18 поени, додека Димитријевиќ натпреварот го заврши со девет поени, шест скока и пет асистенции.