Лошо ѝ се пишува на Македонија во претстојната Лига на нациите (ЛН) што стартува во септември, ако продолжи со јаловите изданија што ја „красат“ во последниве месеци.

Со новиот селектор Гоце Седлоски на кормилото, „рисовите“ одиграа четири меча без победа, а во тие дуели не постигнаа ниеден гол. Последниов меч, пријателскиот дуел кај Турција, заврши со тежок пораз на „рисовите“ (4-0), со крајно неубедлива игра и речиси без шут кон голот.

Беше истакнувано пред овој меч дека главната цел на нашиот стручен штаб е да се подготви тимот за претстојните дуели во Лигата на нациите. Како што сега изгледаат работите, Македонија ќе има многу тешкотии во сегментот „Б“ од ЛН, највисоко ниво на кое сме настапувале во ова натпреварување.

Играта на црвено-жолтиот тим на натпреварите на кои Седлоски е селектор не покажува никаков напредок споредено со она кога на кормилото беше Благоја Милевски. Напротив, тимот изгледа немоќен, без полет, создава малку шанси за да се затресе мрежата, а голови ни за лек. Седлоски дојде во декември, очигледно е дека сака да направи промени во тимот (во составот и во стилот), но позитивни резултати не се гледаат.

Затоа со право е присутна загриженоста во фудбалската јавност како ќе изгледаат настапите на „рисовите“ во ЛН. Следен меч за Македонија е во Скопје во септември на стартот на ЛН, кога играме со моќната Швајцарија, а во нашата група се уште Шкотска и Словенија. Ова се квалитетни противници што ќе создадат многу тешкотии, ако Македонија настапи на нивото слично на последниве натпреварувања.

Седлоски ја прифати одговорноста за високиот пораз во Истанбул, што само по себе не значи ништо. Селекторот изјави и дека досегашните пропусти не смеат да се повторат. Во тоа е сосема во право. Зашто, впечаток е дека кредитот тој го потроши и со уште еден кикс, фер би било да се „раздолжи“, палката да ја препушти на некој друг.

Седлоски: Ја преземам одговорноста за поразот, сите повикани играчи треба да го даваат максимумот