Германската полиција обелодени детали од денешното пукање во градот Рот ам Зе, наведувајќи дека 26-годишен маж ги застрелал своите родители и уште четири членови на своето семејство со полуавтоматска пушка, а потоа ја повикал полицијата и чекал да биде уапсен, пренесува српски „Телеграф“.

Во пукањето во градот на југозападот од Германија се ранети и две лица, од кои едно од нив е во животозагрозувачка состојба.

Осомничениот се заканувал и на деца на возраст од 12 и 14 години, но тие не се повредени.

Уапсен е 26-годишен државјанин на Германија кој ќе биде испрашан од полицијата во присуство на својот адвокат, изјави локалниот шеф на полицијата Рајнер Мелер.

– Во куќата и зад неа, пронајдени се тела на шест лица, тројца мажи (36, 65 и 69 години) и три жени (36, 56 и 62 години) – информираше Мелер, додавајќи дека две од жртвите се родители на напаѓачот.

Мелер наведе дека мотивот за нападот се уште не е утврден, но дека се претпоставува оти станува збор за семејна драма, пренесе „Ројтерс“.

Полицијата го затекнала осомничениот без оружје пред куќата, каде дел од членовите на семејството живееле. Инаку, тој е член на стрелачки клуб, додава „АП“.

Инцидентот се случил во 12.45 минути по локално време.

Рот ам Зе се наоѓа на околу 170 километри северзозападно од Минхен и на 135 километри југоисточно до Франкфурт, напоменуваат агенциите.