Втора година по ред во градинките во Општина Центар се реализира проектот „Здрав оброк за секое дете“, што се спроведува преку програмата на Министерството за земјоделство, шумарство и водостопанство и во партнерство со Министерството за труд и социјална политика. Преку овој проект секое запишано детенце во градинка еднаш неделно ќе добива по еден килограм овошје, кајсии, праски, сливи, круши и јаболки од прва класа од македонски производители. Целиот овој процес е под строг мониторинг на ДИЗ и АХВ кои ќе го контролираат квалитетот и безбедноста.

Општина Центар е првата општина која покрена иницијатива за здрави оброци во градинките и училиштата, а кампањата денеска започна од градинката „Кочо Рацин“, објект „Панорама“.

Овошјето е неизбежна ужинка за сите деца во развој. Токму затоа ме радува што дечињата ќе јадат проверени и безбедни домашни овошја од прва класа произведени во нашите овоштарници и од нашите земјоделци. Мило ми е што кампањата „Здрав оброк за секое дете“ започнува од наша центарска градинка и што при делењето дечињата се запознаат со витамините на овошјата и бенефитот од нивното конзумирање. Важно е овошјето и зеленчукот да бидат вклучени во секојдневното детско мени уште од рана возраст. И ние токму тоа се обидуваме да направиме, да стекнеме здрави навики за здрава и квалитетна исхрана за дечињата – изјави градоначалникот Горан Герасимовски, кој заедно со министрите Љупчо Николовски и Јованка Тренчевска беа во посета на градинката и ја стартуваа кампањата.

Покрај делењето на здрави оброци за дечињата во објектот „Панорама“ во градинката „Кочо Рацин“, беше организирана и креативна работилница во која градоначалникот Герасимовски и министрите Николовски и Тренчевска подготвуваа разни производи од овошје.