Дачиќ: Срби не се вмешани во дестабилизацијата на Молдавија, тоа се инсинуации
Србија одлучно отфрла каква било инсинуација за потенцијална вмешаност на нејзини граѓани во можни насилни настани во Молдавија, изјави денеска српскиот министер за надворешни работи Ивица Дачиќ во телефонски разговор со молдавскиот министер за надворешни работи Нику Попеску.
Во врска со вчерашната изјава на молдавската претседателка Маја Санду дека Москва планира да ја дестабилизира Молдавија со помош на саботери од Русија, Белорусија, Србија и Црна Гора, Дачиќ го известил Попеску дека Србија и Молдавија се пријателски земји и дека секогаш меѓусебно се поддржувале во однос на територијален интегритет, соопшти МНР на Србија.
Дачиќ изјави дека Србија затоа бара од молдавските власти да достават какви било информации за претпоставките до нејзините безбедносни служби и додаде дека Белград ги бара сите информации за тоа „за да спречи некој од Србија да учествува во вооружени и насилни акции насекаде во светот“, што е строго казниво“ според српските закони, се вели во соопштението.
Молдавија е под зголемен руски притисок пред јунскиот состанок во Кишињев на Европската политичка заедница (земјите на ЕУ и нивните политички сојузници), изјави денеска Високиот претставник за надворешна политика и безбедност на ЕУ, Жозеп Борел пред почетокот на министерскиот состанок за одбрана на НАТО во Брисел.
Молдавија денеска го затвори својот воздушен простор поради безбедносни причини, а по извесен период повторно го отвори.
Затворањето на воздушниот простор над Молдавија се случи еден ден откако претседателката Маја Санду ја обвини Москва дека планира да користи странски саботери, со цел да ја собори Владата на Молдавија, да ја спречи земјата да се приклучи на Европска Унија и да ја искористи во војната против Украина.