Патниците во возот кој сообраќал на релација Скопје-Прилеп, а кои во неделата вечерта сигнализираа дека заглавиле кај селото Богомила, Велес, биле преместени во друг воз и стигнале до своите крајни дестинации. Според информацијата од Регионалниот центар за управување со кризи од Велес, која „Слободен печат“ ја доби од ЦУК, застојот траел околу 1 час, поради дефект на дизел локомотивата на товарниот воз кој сообраќал на истата линија.

-Патничкиот воз во кој имало околу 120 патници, се доближил со железничката станица во Богимила, а во меѓувреме била испратена друга локомотива за да го повлече товарниот воз. Се на се според информациите од дежунарана екипа на ЦУК од Велес, немало повеќе чекање од еден час – велат од ЦУК.

Во неделата вечерта, медиумите известија дека поради блокирана пруга, возот кој тргнал во 14 часот од Скопје се` уште не може да стигне до Битола. Според тие информации, возот бил запрен во Богомила, бидејќи во с.Слепче имало расипан товарен воз, поради кој е блокирана пругата и патничкиот воз не може да помине, а како резултат на блокадата, патниците со часови чекале на железничката станица. Дел од нив се жалеле дека не знаат за што се работи, бидејќи кондуктерот им кажал дека можно е да се чека и до полноќ.

Тие на социјалните мрежи споделувале информации дека од МЖ не добиле никаков алтернативен превоз, туку биле оставени да чекаат на железничката станица. Повеќето медиуми објавија дека ова не е прв случај патниците да патуваат на оваа релација неколку часови. Пред една година истиот воз на релација Скопје-Битола доцнеше 8 часа, за на крај воопшто да не стигне до градот, туку да застане во Прилеп.

Инаку експресниот воз „Хераклеа“ на релација Скопје – Битола – Скопје е отстранет од возниот ред веќе неколку години. Оваа најбрза врска меѓу Скопје и Битола не сообраќа од август 2018 година, поради тоа што еден од новите кинески возови е расипан. Пред извесно време од МЖ, рекоа дека штом се отстранат сите пречки поради кои привремено еден од кинеските возови е надвор од сообраќај, експресниот воз веднаш ќе биде воведен во сообраќај.