Циципас против Зверев за финале во Рим
Грчкиот тенисер Стефанос Циципас без поголеми проблеми го совлада домашниот натпреварувач Јаник Синер со 2:0 во сетови и се пласираше во полуфинале на АТП турнирот во Рим, Италија.
Циципас со резултат 7:6 и 6:2 за околу два и пол часа игра го елиминираше Италијанецот и без загубен сет се најде во полуфиналната фаза на мастерсот.
Циципас одлично го започна првиот сет и по брејкот и потврдата на истиот поведе од 3:0, за Синер да пружи соодветно добар отпор и да израмни на 3:3.
Во следниот период немаше пресврти и влеговме во „тај-брејкот“ каде што Циципас едноставно се снајде подобро и по час и половина го освои првиот сет.
Во вториот сет, сè тргна многу подобро за грчкиот играч, кој успеа да триумфира со 6:2 и да се пласира во полуфиналето, каде што ќе се бори со Александар Зверев за финалето во Рим.
Треба да се напомене дека финишот на вториот сет траеше подолго бидејќи имаше нешто подолга пауза откако на еден навивач му се слоши на трибините и лекарскиот тим мораше да реагира.
Германецот Зверев кој исто така без загубен е полуфиналист на турнирот, со 7:5 и 6:2 го елиминираше Чилеанецот Кристиан Гарин за скоро два часа игра.