Бугарија се подготвува за организацијата на Изборот за песна на Евровизија 2027, по првата победа на натпреварот. Четири града понудија да бидат домаќини на големото музичко натпреварување.

Благодарение на Дара и песната „Бангаранга“, Бугарија ја забележа својата прва победа на музичкиот натпревар во Виена. Сега земјата се подготвува за првата организација на тој натпревар следната година во мај, пишува „БНТ“.

Бугарскиот премиер Румен Радев изјави дека победата на Евровизија е огромен успех за Бугарија и ѝ честиташе на Дара за нејзиниот професионализам, посветеност и талент, како и на бугарската јавна служба и на целиот тим.

Во меѓувреме, четири градови го регистрираа својот интерес за организирање на Евровизија 2027. Освен главниот град Софија, за натпреварот се заинтересирани и Пловдив, Варна и Бургас.

Софија има два аеродромски терминали, како и спортската сала „Арена Софија“, каде што се одржа Детскиот натпревар за песна на Евровизија во 2015 година. Таа сала има околу 12.000 седишта, а за време на концертите може да прими 18.000 гледачи.

Властите во Пловдив го предлагаат стадионот „Христо Ботев“, но забележуваат дека му е потребна реконструкција.

Варна има сала со капацитет од околу 6.000 седишта, додека салата во Бургас може да прими речиси 15.000 гледачи.

Покрај големината на салата, при изборот на градот домаќин, се зема предвид и хотелскиот капацитет, како и близината на транспортната инфраструктура.

Се очекува датумот на објавување на градот домаќин на следната Евровизија да биде познат по првите состаноци на БНТ со Европската радиодифузна унија (ЕБУ).

ВИДЕО | Бугарија ја пречека евровизиската победничка како хероина — Дара слета во Софија со водени топови и црвен тепих