Чешкиот претседател во заминување Милош Земан изјави во Белград дека Србија може да посредува во решението на руско-украинскиот конфликт, засновајќи ја оваа оценка на фактот дека Белград не воведе санкции кон Москва, што, според него, „може да биде предност“ за улога на медијатор.

Позицијата на неутралност на Србија, дека не поддржува санкции против Русија, може да биде и предност за евентуалната улога на посредник бидејќи посредникот не смее јасно да стои на едната или на другата страна, рече Земан на заедничката прес-конференција по средбата со српскиот претседател Александар Вучиќ.

Како можни посредници во таа војна тој ги гледа Кина, Турција и Австрија, за која вели дека е неутрална и е членка на ЕУ, иако не е членка на НАТО.

Вучиќ истакна дека Србија е единствената земја во Европа која не воведе санкции кон Русија и дека таа тоа не го крие

„Испративме хуманитарна помош и поддршка на сите начини, ќе испратиме уште повеќе и ќе учествуваме во изградбата на одредени градови и населени места во Украина“, рече Вучиќ.

Земан денеска повтори дека се извинил за учеството на Чешка во бомбардирањето на НАТО на тогашна СР Југославија во 1999 година. Тој ќе остане запаметен како единствен шеф на држава или влада на земја членка на НАТО кој јавно ѝ се извини на Србија за бомбардирањето во 1999 година, кога тој како премиер на Чешка ја одобри интервенцијата на таа воена алијанса.

По разговорот Вучиќ-Земан следеше средба на две државни делегации и потпишување на меѓудржавен договор за зајакнување на културната соработка и формирање на Чешката куќа во Белград, која ќе биде седиште на Чесите, но и простор за собир на Чесите и Србите, состаноци и деловни контакти како и „важно место за односите меѓу двете земји“.