Во германскиот парламент – Бундестагот утре ќе се разговара за Босна и Херцеговина. Свое обраќање ќе има и високиот меѓународен претставник во Босна и Херцеговина, Кристијан Шмит, кој ќе извести за состојбата во државата.

Расправата доаѓа токму сега, кога се очекува конкретна реакција од Берлин на деструктивните сили во Босна и Херцеговина, а откако САД почнаа со воведување санкции кон поединци и кон компании во земјата.

Новата германска влада неодамна ја повика Европската унија да воведе санкции за Милорад Додик, поради неговите сецесионистички политики и одлуката за повлекување надлежности од државно ниво.

Шмит во интервју за Пионер предупреди на раскол во Босна и Херцеговина.

– За да спречиме моменталната ситуација да се претвори во конфликт, во кој луѓето пукаат едни на други, мораме јасно да кажеме: државата не смее да се дели и таа мора да функционира, изјави Шмит.