Полицијата во англискиот округ Сари истражува два одделни пријави за сексуална злоупотреба на деца, покренати по објавувањето на документи поврзани со Џефри Епстин. Во соопштение објавено денеска, полицијата изјави дека станува збор за случаи од минатото, пренесува Би-би-си.

Според соопштението за медиумите, истрагата е покрената откако Министерството за правда на САД објави досиеја за Епстин.

„Едниот извештај се однесува на локации во Сари и Беркшир од средината на 1990-тите до 2000 година. Другиот се однесува на средината до крајот на 1980-тите во западен Сари. Досега не се извршени апсења“, соопшти полицијата.

Тие додадоа дека сериозно ги сфаќаат сите пријави за сексуални престапи и дека ќе работат на утврдување на сите можни линии на истрага со цел да се потврдат информациите и да се соберат докази. Полицијата објави во февруари дека ги проверува своите бази на податоци за постари обвинувања што излегоа на виделина откако беа објавени досиејата.

Епстин беше осуден сексуален престапник кој одржуваше врски со бројни политичари, бизнисмени и познати личности со децении. Тој првпат беше под сериозна истрага во средината на 2000-тите за сексуална експлоатација на малолетници во Флорида, но во 2008 година склучи контроверзен договор со обвинителите со кој се избегна федерално гонење и отслужи кратка казна со бројни бенефиции.

Случајот беше повторно отворен во 2019 година, кога беше уапсен под обвинение за трговија со малолетници со цел сексуална експлоатација. Еден месец по неговото апсење, тој беше пронајден мртов во затворска ќелија во Њујорк, а официјално беше заклучено дека извршил самоубиство, иако околностите на неговата смрт предизвикаа бројни контроверзии и теории на заговор.

По неговата смрт, истрагите продолжија за мрежа на соработници и луѓе поврзани со неговите криминални активности, вклучувајќи ја и долгогодишната соработничка Гислен Максвел, која беше осудена во 2021 година за помагање и поттикнување на регрутирање и злоупотреба на малолетни девојчиња..

На 18 февруари, полицијата, исто така, пријави „наводи за трговија со луѓе и сексуален напад“ во Вирџинија Вотер помеѓу 1994 и 1996 година, но во моментов не е познато дали тие случаи се поврзани со новите истраги.

Џефри Епстин беше пронајден мртов во неговата затворска ќелија во август 2019 година, а неговата смрт беше прогласена за самоубиство.

Во меѓувреме, британскиот премиер Кир Стармер продолжува да биде оптоварен со одлуката да го назначи Питер Манделсон за амбасадор во САД. Манделсон, кој претходно негираше какво било кривично дело, еднаш беше отстранет од функцијата откако се појавија нови информации за степенот на неговата врска со милијардерот Епстин.

„Епстин ме злоупотребуваше додека беше во домашен притвор“ – ново сведоштво на жртва на сексуалниот престапник