Брисел не шпекулира со 2030 година како тајминг за влез на Македонија во ЕУ
Оценката на Брисел е дека војната во Украина го придвижи процесот на проширување на позитивен начин, а лидерите на ЕУ се повеќе посветени на интеграцијата на Западен Балкан.
Македонија, велат европски дипломати, ги почна преговорите со скринингот како прва фаза, а поради ангажманот на владата на билатералните прашања, факт е дека недостига напредок кај другите прашања, вклучувајќи владеење на правото, борба против корупцијата, чист воздух, слобода на изразување… и повторно на сцена ги ставаат уставните измени.
Во Брисел се свесни дека тешко ќе се стигне до двотретинско мнозинство за усвојување на уставните измени, бидејќи, како што велат, „имате тежок сосед кој постојано ги менуваше барањата кон Северна Македонија”, но сегашниот договор го отвора патот за земјата па порачуваат „конечно вреди да се оди напред”.
Но никој не сака да ги коментира прогнозите од македонската Влада за 2030 година како реален рок за влез во Унијата, со објаснување дека тие никогаш не шпекулираат за тајминг, туку важно е земјата да биде подготвена.