Струмичка Брера влегува во самата завршница од сезоната без шефот на стручниот штаб, откако Мартин Алаѓозовски денеска одлучи да се повлече од тренерската функција.

Тимот се соочува со сериозна резултатска криза и во последните осум натпревари има само една победа, што го остави на осмата позиција со 33 освоени бодови. Тоа место носи неизвесен бараж за опстанок во Првата лига, а ситуацијата дополнително ја отежнува фактот што Арсими, како прв тим над опасната зона, има два бода повеќе на пет кола пред крајот.

Од клубот се заблагодарија за ангажманот на досегашниот стратег, потенцирајќи ја неговата улога во тежок период за тимот.

„Во еден од најтешките периоди за клубот, Мартин покажа карактер, посветеност и професионализам. Остави длабока трага во тимот и секогаш ќе биде дел од нашата приказна“, соопштија од Брера.

До крајот на првенството, главниот фокус на струмичани ќе биде обезбедување опстанок во елитното друштво, задача која воопшто нема да биде лесна со оглед на моменталната форма и бодовната разлика.