Регионот од утре би можел да се соочи со сериозни нарушувања во товарниот сообраќај, откако превозниците од Босна и Херцеговина најавија масовни протести поради правилата што им го ограничуваат престојот на професионалните возачи во Шенген-зоната, информира „Радио Сарајево“.

Според најавите, блокадите ќе почнат во 7 часот изутрина и ќе ги опфатат клучните гранични премини за товарни возила, меѓу нив и оние кон Србија.

Превозничките здруженија предупредуваат дека станува збор за реакција на, како што велат, неправеден третман на возачите од Западен Балкан, на кои им се отежнува нормалното извршување на работата.

Во заедничкото соопштение, Конзорциум Логистика БиХ порачува дека протестот не е изненаден потег, туку резултат на повеќе од една година неуспешни обиди проблемите да се решат институционално. Оттаму велат дека 14 месеци учествувале на состаноци, предлагале мерки и чекале државните институции да покажат дека системот може да функционира, но дека во меѓувреме не бил решен ниеден од клучните проблеми на секторот.

Иако, како што тврдат, постоеле ветувања од министри и од различни нивоа на власт во БиХ, тие останале само на хартија: биле донесувани заклучоци и постигнувани договори, но без конкретна примена во пракса.

Протести ја тресат Грција: се затвораат бензиски пумпи, штрајкуваат сточарите и таксистите

Превозниците предупредуваат дека проблемот одамна не е само административен, туку станува прашање на опстанок на цел сектор. Посебно го издвојуваат правилото 90/180 во ЕУ, прашувајќи како е можно професионалните возачи до 90 дена да не се сметаат за проблем, а потоа, иако ги имаат сите дозволи и квалификации, да се третираат како безбедносен ризик.

Според нив, поради ваквата состојба фирмите постепено пропаѓаат, возачите се враќаат од граници или добиваат забрани за влез, а транспортниот сектор се турка кон колапс. Затоа бараат итни и конкретни мерки: враќање дел од акцизите за гориво, даночни олеснувања, попусти за патиштата, реформа на царинскиот систем, помалку парафискални давачки, побрзи процедури на границите и јасно регулиран статус на професионалните возачи во ЕУ.

Според нив, без ваков пакет мерки, транспортот во БиХ нема да може нормално да опстои.

Доколку не се најде брзо решение, од 14 април би можеле да се приклучат и српските транспортери, со уште пошироки блокади што би траеле сè до добивање писмени гаранции од Европската комисија.

Се стравува дека тоа ќе предизвика долги колони и проблеми во снабдувањето низ Балканот.

Камионџиите од БиХ најавија нови блокади, македонските транспортери проблемот ќе го решаваат со вадење визи од членки на ЕУ