Функционер на проруските власти во делумно окупираниот регион Херсон, вечерва е повреден во експлозија на автомобил, објавија руските државни медиуми.

Виталиј Буљук, заменик-гувернер на областа Херсон, која Русија ја анектира, бил вклучен во „инцидент“ со автомобил, објави новинската агенција ТАСС и официјалниот канал на Телеграм на проруската администрација на Херсон.

Според „Си-ен-ен“, информациите за повредите на Буљук се контрадикторни. Како што јави ТАСС, повикувајќи се на шефот на регионалното Министерство за здравство, Вадим Илмиев, Буљук е повреден во „експлозија на автомобил“.

„Тој е ранет, но неговата состојба е стабилна. Повредите се умерени. Се наоѓа во една од болниците во регионот“, рече Илмиев.

Но, официјалниот канал на Телеграм на проруската администрација на Херсон известува дека Буљук „не е повреден“ и дека „неговиот живот моментално не е во опасност“. Истиот канал претходно објави уште неколку детали за инцидентот, наведувајќи дека се случил во градот Скадовск и дека „еден цивил е убиен“.