Бен Стилер и Кристин Тејлор ја објавија својата разделба во 2017 година, по 17 години брак, што ги шокираше многу нивни обожаватели. Во заедничка изјава за медиумите во тоа време, тие рекоа: „Со огромна љубов и почит еден кон друг, и по 18 години заедно како двојка, донесовме одлука да се разделиме“. Тие нагласија дека нивен приоритет останува воспитувањето на нивните деца, ќерката Ела (23) и синот Квин (20), како посветени родители и најблиски пријатели.

Во еден редок и искрен момент, познатиот актер и режисер Бен Стилер отворено проговори за еден од најтешките периоди од својот живот – неговата долгогодишна разделба од сопругата Кристин Тејлор. Во својот нов, длабоко личен документарец „Стилер и Мира: Ништо не е изгубено“ (Stiller & Meara: Nothing is Lost), кој премиерно беше прикажан на Филмскиот фестивал во Њујорк, Стилер призна дека се чувствувал целосно скршен додека неговиот личен живот се распаѓал, и покрај тоа што неговата кариера цветала.

„Мојата кариера одеше добро долго време, но работите во мојот личен живот не беа баш најдобри. Се чувствував неурамнотежен и несреќен, некако отсечен од моето семејство, од моите деца и малку изгубен“, открива 59-годишниот актер во филмот, давајќи ѝ на публиката увид во неговиот внатрешен живот и борбите со кои се соочувал подалеку од рефлекторите.

Документарецот „Стилер и Мира: Ништо не е изгубено“ се прикажува во одредени кина на 17 октомври, а ќе биде достапен за стриминг на Apple TV+ на 24 октомври.

За потсетување, Бен Стилер и Кристин Тејлор по разводот во 2017 живееја одвоено речиси четири години, а Стилер подоцна призна дека овој период му дал простор да види каква е всушност нивната врска, каков е неговиот живот без сопругата и колку навистина ја сака нивната семејна единица.

Клучниот момент што го поттикна длабоко да размисли се случи по смртта на неговиот татко, легендарниот комичар Џери Стилер, во 2020 година. Таа болна пресвртница го наведе да почне да размислува за снимање филм за неговите родители, Џери Стилер и Ен Мира, кои не беа само успешно комично дуо, туку и брачна двојка која беше заедно повеќе од 60 години.

„Почнав да размислувам за моите родители и за целиот стрес и напнатост што ги паметам од моето детство, притисокот од заедничката работа и како тие останаа заедно и покрај сè. Мислам дека сакав на некој начин да разберам како го направија тоа“, објасни Стилер, откривајќи дека одговорите за спасување на сопствениот брак ги барал во приказната на своите родители.

Документарецот „Стилер и Мира: Ништо не е изгубено“ не се занимава само со приватниот живот на Стилер, туку првенствено ја слави неверојатната кариера и љубовната приказна на неговите родители. Џери Стилер и Ен Мира станаа познати како комично дуо во 1960-тите, а во текот на нивната кариера се појавија 36 пати во иконското „Шоуто на Ед Саливан“. Нивниот брак, кој траеше до смртта на Ен во 2015 година, беше пример за партнерство и на сцената и надвор од неа. Филмот, кој користи архивски снимки и аудио снимки снимени од самиот Џери, нуди интимен портрет на едно од најомилените семејства во американската комедија. Според списанието „Пипл“, филмот е емотивно патување кое ги истражува сложеностите на семејните односи, притисоците на славата и моќта на љубовта што трае со децении.