Американскиот претседател Џо Бајден ги повика своите колеги од Русија и од Кина, Владимир Путин и Си Џинпинг на прв голем меѓународен Самит за климата, изјавија претставници на администрацијата во Белата куќа за Асошиејтед прес.

Соединетите Американски Држави се надеваат дека Самитот на 22 и на 23 април ќе придонесе за забрзување и продлабочување на глобалните напори за намалување на загадувањето со фосилно гориво што ја уништува климата.

Бајден се обидува да го обнови светскиот Форум за клима, собирајќи ги лидерите на најголемите светски економии во кој претходно учествуваа Џорџ Буш и Барак Обама, но го напушти Доналд Трамп.

Денеска од Вашингтон се пратени 40 покани до лидери на најголемите светски економии, донатори и претставници на земји кои се најпогодени со климатските промени.

Бајден, со организација на Самитот, исполнува едно од своите предизборни ветувања за намалување на експлоатацијата на јаглен, природен гас и нафта.