Австралиец обвинет за силување на 24 деца, ги „ловел“ преку семејството и пријателите
Маж од Западна Австралија е обвинет за повеќе од 400 сексуални престапи врз деца.
47-годишниот маж од Перт е обвинет, меѓу другото, за 240 случаи на малтретирање на дете до 13 години, 98 за несоодветно снимање на дете до 13 години и 44 сексуални пенетрации на дете до 13 години, соопшти полицијата вчера.
Полицијата покрена истрага по дојава во јули минатата година. Таа ја пребарала куќата и работното место на 47-годишникот и пронашла околу 3,8 милиони несоодветни фотографии и видеа, пишува CNN.
Полицијата соопшти дека идентификувала 24 момчиња и девојчиња кои биле сексуално злоставувани од мажот во периодот од 2015 до 2021 година.
-Ова е една од најзначајните истраги за злоставување на деца спроведена во Западна Австралија во однос на пронајдениот материјал и бројот на жртвите, изјави детективот Хамиш Мекензи.
9 Вести наведува дека малтретираните деца биле на возраст од 3 до 13 години. Полицијата верува дека мажот доаѓал до жртвите преку семејството и пријателите.