Доколку помисливте дека таблото на матурантите е изум кој потекнува од современото општетсво длабоко се лажете, затоа што сега ќе ви го докажеме спротивното.

Наместо денешниот лист хартија, нашите претци го користеле каменот за пишување на разновидни документи – впрочем и античката цивилизација обично се нарекува „цивилизација во камен“.

Во тие времиња во камен се исчукувале официјалните државни документи, законите одлуките на локалните управи. Дури и во личниот живот на луѓето во антиката, каменот бил користен за најразчични документи како купопродажните договори, за изработка на вотивни споменици, кои тогаш имале третман на денешните икони, како и надгробните споменици.

Гимназион

Видовме како изгледале и првите таблоа на матурантите, нормално направени од камен.

Со помош на д-р Славица Бабамова – кустос советник во Археолошкиот музеј имавме можност и прилика да се запознаеме подетално со оваа културно богатство.

– Како што денес на крајот на училишната година на видни места се објавуваат таблоа со тие кои го завршиле своето образование, така и во антички времиња нивните имиња се запишувале на камен. Од античкиот град Стибера во нашиот музеј можете да го видите импозантниот столб пронајден во близина на училиштето кое во тоа време се нарекувало гимназион, од древниот град. На оваа камена подлога читаме списоци на ефебите, а тоа се учениците кои го завршиле своето образование во три училишни години. Испишани се вкупно 135 лични имиња на ученици – вели Бабамова.

Погледнете ја новата епизода на АРТеФакти, со која заеднички ќе нурнеме во првиот век од новата ера.
Водител и автор на проектот е Александра Вуксановиќ.