Македонско-австралиското „3-Блок студио“ направи краток анимиран филм за глобалниот карантин. Во време кога огромен број од светската популација поради коронавирусот радикално го промени секојдневниот живот, а секоја индивидуа на свој начин се соочува со изолацијата, петчлена екипа од студиото го искористила слободниот простор за експериментирање и оттаму се родила идејата за анимираниот филм „Карантин“.

Приказната во филмот е на Јакоб Ниланд, Михаил Наумов, Љубомир Саздовски и Иван Андреевски, кој, исто така, е режисер и потписник на сценариото. Арт-продукцијата и дизајнот се на Наумов и Саздовски, кој е одговорен и за моделирањето и осветлувањето. Монтажата и анимацијата се на Наумов, а Андреевски стои зад саунд дизајнот. Музиката е на Владимир Петковиќ.

– Од креативна страна се обидовме да доловиме како секој од нас би се справил со ваков застој на секојдневиот ритам во кој живееме, а од техничка страна пробавме да претставиме традиционална техника на анимирање, како Stop Motion (која се работи практично, со физички кукли и фотоапарти), преку дигиталните алатки и 3Д-анимацијата. Беа користени доста стандардни софтвери за ваков вид на работа. Главно Autodesk Maya и Adobe After Effects, како и неколку дополнителни софтвери – истакнуваат од студиото.

Студиото работи за aвстралискиот и балканскиот пазар и е најактивно во полето на 3Д и 2Д анимацијата, изработка на визуелни ефекти, како и осмислување и создавање анимирани ликови – карактер анимација.

(Текстот е објавен во „Културен печат“ број 27, во печатеното издание на „Слободен печат“ на 17-20 април 2020)