Поранешниот напаѓач и селектор на Украина, Андреј Шевченко е избран за претседател на Фудбалската федерација на Украина на денешниот конгрес во Киев.

Изборот на Шевченко беше очекуван, тој на изборите влезе како единствен кандидат и освои 93 од 94 гласови на делегатите. На функцијата го наследува Андриј Павлеко кој во февруари 2023 година беше сменет поради сомнежи за корупција.

Шевченко како селектор на Украина ја водеше репрезентацвијата од јули 2016 до август 2021 година. Под негово вофство тимот не се квалификуваше на Мундијалот во Русија 2018 година, но играше на Европското првенство во 2021 каде што стигна до четвртфиналето.

По завршувањето на кариерата како фудбалер 47-годишниот Шевченко работеше и како тренер на италијанска Џенова, но доби отказ по само два месеци поради лошите резултати.

Како фудбалер Шевченко ја освои „Златната топка“ во 2004 година, а дресот на репрезентацијата на Украина го носеше на 111 натпревари и постигна 48 голови.